صبغ الشعر١٠١ + نظرة على هذا الموسم |Hair Dying Trends

صبغ الشعر، موضوع طويل عريض عميق ما ينتهي .. وعدتكم اتكلم عنه وكثير منكم ألح آنزله باسرع وقت لذلك راح أنزله حتى لو ماكنت متأكدة إن هذا هو الشكل

النهائي الُمرضي للموضوع.

بما أن الأجزاء الي ببالي كثيرة راح أتكلم بالعموميات يعني ماراح أتكلم عن أسماء منتجات معينة لان البوست كذا بيكون عملاق جدا, راح اركز على الالوان الدارجة

حالياً ولو اغفلت اي جزء ساعدوني بالردود واضيفها باذن الله.

1.

أول وأهم جزء سحب اللون أو البليتش، كيف وليش وهل هو ضروري؟

سحب اللون أكبر قرار ممكن تتخذينه بحق شعرك، مهما يكن الأمر البليتش بيدمر شعرك سواء كان بشكل ملحوظ أو بصورة ما يشوفها ويحس فيها غيرك.

البليتش عبارة عن بودرة زرقاء ومعالج(ديفولبر) سائل أو كريمي يخلط بمقدار واحد من البودرة ومقدارين ديفالوبر، ينحط على الشعر ٤٥ دقيقة

بعدها راح يكون الشعر تقريباً اصفر فنحتاج اننا نحط عليه تونر يشيل الاصفرار ويكون الناتج النهائي شعر ابيض.

متى نحتاج نسحب اللون؟ إذا كنا بنتحول للون فاتح جداً مثل  الابيض، الوان الباستيل، الفضي ، الاشقر البلاتينوم،الالوان جميعاً بشكل ساطع.

ايش الي يخليه سيء لهالدرجة؟

عشان نستوعب الفرق بين كل مايخص الشعر، اول شيء لازم نعرفه ان الشعرة اساساً لونها أبيض..في الاصل، لكن كل انسان تاثر صبغة الميلامين عنده على لون الشعر حسب جينات الشخص، فالبليتش هنا ايش يسوي؟ راح يكسر كل الاشياء الي تغطي شعرنا الابيض اساساً وتظهر لونه الاساسي، خلال هالعملية وحسب قوة الصبغة الطبيعية للشعرة ممكن انها تتكسر هالروابط نهائيا وتطلع الشعرة بيضاء او انها تكون عنيدة وما ينفع معها البليتش من اول “مواجهة” وتتحول للبرتقالي او الاصفر ونحتاج “مواجهة ” ثانية.

الشيء الثاني الي نستخدمه للتلوين، الصبغة.. وعادة الصبغة تجي بانبوب نضيف لها “ديفالوبر” معالج سائل، المعالج يسوي تقريباً مفعول البليتش بس بشكل الطف بكثييير يسحب من اللون الطبيعي المقدار الي يكفي انه ينصبغ باللون الي اخترناه للصبغة، يعني يكسر شوية روابط بحيث تدخل الصبغة وتطبع لونها على الشعرة.

يعني لو صبغتنا ماهي دائمة راح نلاحظ بعد ماتبدأ تطلع من الشعر تدريجياً إن الشعر مايرجع للونه الاصلي لان الديفالوبر فتّحة تكّة فصارت الروابط مكسورة وفاضية وتطلع بلون غالبا برتقالي او نحاسي يحتاج لصبغ مرة ثانية او ع الاقل معالجة للتون.

اما لو قارنا البليتش، لو فرضاً حطينا فوق البليتش صبغة باستيل مثلا غير دائمة وبدأت تطلع راح يرجع الشعر ابيض . والابيض ماراح يتغير عليك ولا يطلع مع الغسيل.

اخر شي المصحح او التونر، الخطوة الاخيرة الي راح تشيل اي تون مايعجبك، غالبا نستخدم التونر عشان نلغي النحاسي او البرتقالي من الشعر، لكن طبعا نقدر نعدل اي تون نبغاه بسهولة، نخلط مقدار من التونر مع مقداريم من الديفالوبر ١٠ او ٢٠لمدة عشرين دقيقة..مرة ثانية العجلة راح توريك بالضبط اي لون يلغي اي تون.يعني التونر مصحح للتون وليس صبغة ملونة.

التونر مايعتبر صبغة، لانه راح يغلف الشعرة بحيث يلغي اللون اللي مانبيه، بمعنى، نقدر نحط التونر متى ماحسينا ان فيه ضرورة، ماراح يأثر على الشعر، لا بالضرر، ولا باللون(لا يفتح ولا يغمق)مجرد تعديل فقط.

طيب، حلوين لين هنا؟

نجي للنقطة الي مهم جدا نفهمها، الديفالوبر..

الديفالوبر عادة يجي بارقام معينة واغلبنا مايعرف وش الفرق، وغالباً صاحب المحل او الصيدلي بينصحك بشي لكن من الممكن يكون غلط لانه مايعرف انتي شعرك ايش وبتصبغين ايش؟

اقل نسبة في الديفالوبر ١٠٪ وهذي النسبة ما تفتح الشعر نهائياً، لذلك هذي الدرجة الانسب عشان نستخدمها مع التونر.

نجي لل٢٠٪ برضه، اذا ماكنتي شقراء بطبيعتك ماراح ياثر معك الا اذا كنتي بتصبغين لون اغمق او افتح من لون شعرك بدرجة وحدة فقط.

٣٠٪ يفتح شعرك  بحيث يتقبل اي لون تحطينه عليه، يفتح إلى ثلاث او اربع درجات.

٤٠٪ اعلى شي واكثر ضرر، لكن لو كنتي تبين شعرك يكون فضي من الجلسة الاولى هذا الي بيجيب الفضي.

يعني ممكن اجيب صبغة بلون واحد واخلطها مع ٣ درجات من الديفالوبر كل نسبة بتعطيني درجة مختلفة تماما.

وعلى طاري الفضي، اللون الي مش بس لازال موضة لكن إنتشر حالياً بشكل أوسع واكبر من اي وقت ثاني..

راح نحتاج اننا١. نفتح لون الشعر “بليتش” لحد مانوصل للابيض ٢.ومن بعدها نصبغ رمادي، ٣.وتونر بنفسجي.. ولو خلينا الشعر اغمق يعني صبغنا على اشقر بدل الابيض راح نطلع بنتيجة اغمق والاثنين دارجين.

وطبعا الاشقر البلاتينوم لازال موجود وله حضور قوي، ونوصل لهاللون١. بالبليتش٢. والتونر الاش او الرمادي.

نجي للالوان والي لازالت موضة وما اعتقد بتخف قريب.

هل ضروري اسحب لون؟

حسب، انتي اخترتي اي لون وتبينه كيف؟  يعني الباستيل ماراح يضبط بدون سحب لون.. لكن الالوان الثانية ممكن.

لو فرضنا تبين لون غامق بنفسجي او عودي، وتبينه كامل او على الاطراف.. يمكن ماتحتاجين نهائي للسحب ..لان الالوان هذي لو صبغناها على شعر طبيعي راح تبان كلمعة في الاضاءة البيضاء وتحت الشمس، و كل ماتفتح لون الشعر تحت الصبغة كل ما كان اللون ساطع اكثر بالضبط نفس الكلام على الفضي. يعني ممكن اصبغ على اشقر بدون بليتش؟ ممكن ..ممكن اصبغ على بني؟ ممكن كل شي ممكن المهم انك تعرفين بالضبط انتي بتوصلين لاي درجة من اللون ، اي عمق.

هذي مثلا نتيجة صبغة بدون سحب لون(لاحظي اللون الاصلي للشعر فاتح)، لكن لاحظي انها تصور تحت الشمس وهذا الي يخلي اللون واضح، لو كانت مصورة في غرفة ماكان اللون بيطلع واضح بهالشكل.كان بيطلع اسود مع لمعة بنفسجي.

هنا نتيجة درجة مختلفة من البنفسجي على شعر فاتح..وزي ماقلنا كل ما افتح يبان اوضح.

هذا هو الفرق الي ابي اوضح لكم اياه، ان اللون ممكن يصبغ ع الغامق والفاتح لكن النتيجة تختلف..فانتي فكري وشوفي بالضبط الدرجة الي حابتها وقرري من خلالها اذا تحتاجين تفتيح، او بليتش او لا. لاحظي اللون صبغ على الابيض وعلى البني بشكل مختلف رغم اننا استخدمنا نفس الصبغة.

هذي نتائج لالوان الباستيل مع البليتش، طبعا الباستيل لو تلاحظون كيف عمق اللون بالصور فوق وبين الباستيل تحت، السبب اننا بعد ما وصلنا للابيض فوق صبغناه باللون مباشرة والنتيجة لون عميق.. لكن الباستيل نصبغ اما بلون اساسا فاتح او نقطة من اللون على كمية بسلم تكفي تغطي الشعر المفروض الخليط يكون لونه اغمق من اللون الي نبيه بدرجة نحطه على الشعر ونتركه على الاقل ٤٥ دقيقة ونغسله، وكل ماخف اللون كررنا العملية او ممكن نخلط جزء من اللون مع البلسم ونخليها عندنا ونستخدمه كل غسله لمدة ٥ الى ١٠ دقايق ونشطف.

وممكن مع البليتش ان اللون يكون اعمق من كذا زي

فيه نقطة بقولها قبل انسى الي هي ال”فيد” او نزول الصبغة، اغلب الالوان حتى لو مكتوب عليها دائمة ماتمسك بعد البليتش وتنزل مع الشامبوات القوية والكلور ..الخ

فننتهي احياناً بلون ثاني ماحسبنا حسابه، واللي هو الاندر تون للون الي صبغناه، مثلا انا صبغت بنفسجي و بعد فترة عانيت من القشرة(وراثية) فكالعادة جبت الشامبو الخاص بالقشرة واستخدمته، لكن المعروف ان شامبو القشرة قوي جداً ع الشعر فالي صار ان الصبغة نزلت وتحول شعري للاخضر 🙂 ما اخفيكم اني انفجعت نوعا ما، بس المضحك بالموضوع ان الكل حب الاخضر علي هههههه وطبعا صعب نشيل الاندرتون هذا فعادة الحل انك تصبغين مرة ثانية، او تجيبين عدة تشيل اللون وهذا الي سويته.

تختلف درجة نزول اللون واللون الي يطلع حسب لون الصبغة وطبيعة شعرك فيه ناس تنزل الصبغة تدريجياً زي ماهي، وناس تقلب معهم للون ثاني، زي النتيجة في الصورة لصبغة كانت زرقاء.

نجي لتريند هالموسم، لون الصبغة يكون عميق او ساطع ع الجذور ويتفتح ع الاطراف.. والموضة الثانية الدائمة على ما اعتقد لون واحد بتدرجات مختلفة

ببساطة كل اللي نسويه اننا نصبغ الجذور باللون الي معنا والاطراف نفتح فيها اللون سواء بطريقة الخلط مع البلسم او بلون اصلا فاتح او باضافة صبغة بيضاء وكثير من البنات الجريئين بالتغيير حطوا الجذور لون والاطراف لون ثاني مختلف.

اللون بتدرجات مختلفة(بالياج)،  للالوان الطبيعية سواء بشكل جريء وواضح او بشكل خفيف متموه

وفيه كثير من الصور الي مرت علينا يكون فيها الشعر اشقر او بني وفيه لمحة لون ثاني.. بعض المنتجات الي نقدر نسوي فيها هالحركة هي الشامبو والبلسم الملون

وطبعا التغيير هنا يكون خفيف، غير دائم، وممكن نتحكم فيه..ممكن اننا نشتريه جاهز تحت مسمى معزز لون او كولور انهانسينق تريتمنت، او اننا نسويه بالبيت(نخلط نقطة من اللون “مانك بانك مثلا” مع البلسم او الشامبو)ونتيجته حلوه.. الغالب على التجارب الروز قولد او الذهبي بلمحة وردية وايضاً البني بلمحة وردية

آخر نقطة بتكلم عنها العناية

الشعر بعد اي صبغة من اي نوع راح يتاثر ويجف، ويعد البليتش والالوان القوية راح يتضاعف الضرر، على فرض انك قرأتي تدوينة الصبغة بأقل الأضرار راح اتكلم فقط عن العناية بالشعر الملون.

بالنسبة للشامبو، يفضل جداً اننا نستخدم شامبو لطيف على الشعر وخالي من السولفات وغيره بحيث نحافظ على اللون اطول مدة ممكنة، ونغسل فروة الراس فقط بالشامبو ماندعك فيه باقي الشعر لان الرغوة الي راح تنزل اكثر من كافية.

البلسم لازم نستخدمه في كل غسلة لازم جداً جداً والماسك نستخدمه مرة اسبوعياً ع الاقل.

اذا كنا نحتاج اللون ينزل بسرعة، نقدر نستخدم شامبو هيد اند شولدز نغسل فيه مرتين او ثلاثة وتطلع الصبغة.

ونستخدم ع الاقل مرة بالاسبوع شامبو بنفسجي اذا الشعر اشقر، او ازرق اذا بني(نرجع للعجلة) وبعدها طبعا بلسم.

الترطيب ثم الترطيب ثم الترطيب، ونبعد عن التصفيف بالحرارة قدر الامكان.حتى المويا الحارة في الشاور.

احس كذا الموضوع بشكل عام مريت على اهم النقاط الاساسية فيه، اذا حابين اتكلم عن شي معين عن صورة مثلا حابين اشرح كيف ممكن نوصل لنتيجتها او عن منتجات معينة تواصلوا معي على صفحة الاسئلة في اعلى الصفحة او في الردود تحت وبإذن الله اتكلم عنها باقرب فرصة.

#بدونسحبلون #سحبلون #شعر #صبغةالشعر