اولابليكس | Olaplex

Ola!! وياهلا

يمكن أكثر منتج مايحتاج مقدمة ولاتعريف عنه لحد الآن 🙂 أولابليكس السحر

اولابليكس منتج طلع قبل سنة أو سنتين واثار ضجة غير طبيعية ويستحق فعلاً هالضجة، هو منتج مكون من ثلاث خطوات، وينحط مع الصبغة وبعد الصبغة، بطريقة راح اشرحها بالتفصيل..

وظيفة الاولابليكس انه يحافظ على الشعر وصحته من اضرار الصبغة، لكن السحر الي صار والي خلى الكل يبحث عنه ويعتمده إنه تعدى هالشيء وصار علاج مصحح لضرر وتلف الشعر السابق . يعني لو شعرك مصبوغ ومتضرر وحابه تصبغين مرة ثانية اولابليكس مش بس بيمنع الضرر من الصبغة الجديدة راح يعالج حتى الضرر السابق!

اذا تتذكرون وقت ماصبغت كيم من الاسود للبلاتينوم والكل استغرب كيف شعرها ماتضرر واحترق

وهنا نتايج كثيرة للشعر قبل وبعد الاولابليكس

كون المنتج موجّه أساساً للمختصين، بيعه من خلال الموقع الرسمي يحتاج رخصة صالون، لكن طبعاً توفر في مواقع ثانية مثل امازون واي باي وحتى في متاجر الانستجرام.

وأيضاً صار ينباع مش بس كمجموعة متكاملة من ٣ خطوات، صار فيه كل خطوه لحال لو حبينا.

وطبعاً منه أحجام، حجم صغير يكفي لاستعمال او اثنين، وحجم متوسط يكفيك ستة الى عشرة استخدامات، وحجم كبير للمشاغل او المختصات.

طيب خلونا نتكلم عنه بشكل مفصل، زي ماقلنا هو مكون من ٣ خطوات:

رقم واحد: راح ينخلط مع الصبغة، طبعاً بنسبة معينة مكتوبة وموضحة .

رقم إثنين: بعد ما ينتهي وقت الصبغه، نغسلها بمويا فقط وبعد مانتأكد إن الصبغة طلعت من الشعر تمام، نحط من رقم اثنين على الشعر بشكل كامل زي الماسك ونتركه عشر دقايق. ونشطف.

رقم ثلاثة: راح يكون منتج يحافظ على النتيجة نستخدمه تقريباً مرة بالاسبوع كماسك للشعر.

يُفترض لو سويتي شعرك في صالون واستخدموا لك اولابليكس، انهم يعطونك من رقم ثلاثة معك للبيت كماسك يحافظ على شعرك.

ومن حقك تسألين وتطلبين إستخدام الاولابليكس على شعرك

كيف أعرف كم أحط من رقم واحد؟

لكل أنبوب صبغة راح نضيف ٣.٧٥ ملم، والعلبة مكتوب عليها تعليمات الاستخدام كاملة.

اضافة لانه متوفر تطبيق للمنتج على الاندرويد والاي او اس.

وحطي ببالك آنه راح يقلل درجة ال”اكسجين” يعني اذا بنستخدم عادة ٣٠ نحط ٤٠ اذا بنستخدم اولابليكس

هل هذي الطريقة الوحيدة لاستخدامه؟

طبعاً زي اي منتج ثاني الناس راح تتفنن بطرق للاستفاده منه.

بالنسبة لرقم اثنين، ممكن نستفيد منه في تنفيذ صبغات الباستيل بدل مانخففها ببلسم عادي نقدر نستخدم رقم ٢.

فيه طريقة يُستخدم فيها بدون صبغة..

يُضاف ١٥٪ رقم واحد، والباقي ماء فاتر. . ويُرش على الشعر كامل ويترك ٢٠ دقيقة، بعدها نشطف ونحط رقم ٢ لمدة ١٠دقايق.

ايش نوع الصبغة الي نضيفها معه؟

جميع أنواع الصبغات الكيميائية بلا استثناء، وحتى صبغات الفيقن زي مانيك بانيك ينفع ينحط معها،وطبعاً ينحط مع سحب اللون.

يباع كمجموعة زي ماقلنا من ٣ حبات : يكون فيها حبة من رقم واحد وحبتين رقم اثنين.

#اولابليكس #hair #شعر #olaplex #ايامالتدوينالعربي #بدونضرر #صبغة #عناية