التجهيز لك وللمولود
- ruba
- Jan 22, 2019
- 5 min read
التجهيز للمولود من أمتع المراحل والتجارب وأكثرها حيرة، خصوصاً إذا كان أول طفل و حفيد للاسرة
او كان فيه فارق كبير بينه وبين اخر طفل. عموماً، بشارككم في هالتدوينة قائمتي مع تعليق وتقييم لكل منتج جربته، يعني بحط القائمة بدون حذف ولا تنقيح و تحت كل بند بعلق اذا كان كان مفيد او لا.اتمنى يكون واضح.
.وأكيد طبعاً هذي قائمة شخصية مو شرط أبداً تمشين عليها، زيدي واحذفي زي ماتشوفين مناسب لك. وبالأخير السوق ترى ما يطير ولا يعزّل اذا نقصك شي انزلي السوق او وصي او اطلبي.
بس نصيحتي بالملابس خصوصاً لا تكثرين لان الطفل بسرعة يكبر !
نجي لتجهيزك انتي، بنحتاج مجموعة اشياء اساسية ، واشياء ثانوية ، وبالنسبة لشنطة المستشفى راح تنزل بتدوينة اخرى ان شاء الله.
مشد ما بعد الولادة: الخيارات كثيرة جداً ابحثي وشوفي الأنسب لك، وطبعاً حسب وضحك وحالتك الصحية، اسألي طبيبتك عن رايها ومتى انسب وقت للبسه ولمدة كم..الخ.
انا جربت الثلاثي او الاندونيسي وصراحة ما عجبني ابد يقيّد ولا ينفع للجلوس مثلاً، يبغالك تمشين او تتحركين وانتي لابسته وكنت وقتها مريضة فماقدرت استعمله كثير. في المستقبل بستخدم شي عملي أكثر ومرن ممكن سبانكس مثلاً أو البرازيلي، مريح احساس الشد وان بطنك يكون مضغوط بس بطريقة ماتقيدك.
بجامات /قمصان/ ملابس للبيت: بتحتاجين لملابس مريحة لوقت الترضيع سواء عادية بس لها ازرار من فوق، او مخصصة للترضيع ولها فتحات. ماراح يرجع جسمك فوراً لشكله قبل الحمل خليك راهية شوي بالمقاسات خصوصاً القمصان والتيشيرتات اريح وتقدرين تلبسين تحتها ملابس قطنية على جسمك اذا تحبين.
مخدة ترضيع: مهمة جداًلاتستهينين فيها، بتريحك جداً بتجلسين زين وبشكل مريح ولاتضطرين تشيلين البيبي فبتصير يدك تقريباً حرة🏻. سواء ترضعين طبيعي او صناعي بتخلي العملية اقل تعب خصوصاً ان الوضع جديد والرضعات متقاربة ولمدة طويلة.
اغراض الترضيع الطبيعي:
جهاز شفط كهربائي مع البرا.
لو كنتي تفكرين تشفطين حليب وتجمدينه او حتى تستخدمينه خلال اليوم جهاز شفط كهربائي بيساعدك جداً ويختصر الوقت، اقري كثير واسألي طبيبتك عنه. انا اخذت مديلا من مذركير او بيبيز ار اص، الخيارات عندنا محدودة، بحط لك هنا فيديو لوحدة امريكية تقارن بين اجهزة كثيرة بناء على تجربتها اذا تحبين تطلبين.
وتقدرين تأجلين هالموضوع لبعد الولادة ان شاء الله بحيث تشوفين وضعك كيف، لأن أغلب الاطباء ينصحون تأجيل الشفط لبعد شهر من الولادة (في حال التجميد لوقت لاحق).
البرا الي اقصدها في الصورة تعطيك حرية وماتحتاجين تمسكين بيدك.
اكياس خاصة لتجميد الحليب: موجودة عند مذركير وسنتربوينت وبيبيز ار اص وغيرهم.
ملابس داخلية للترضيع: طبعاً تكلمنا عنها بالتدوينة السابقة.
غطاء ترضيع: عشان مانمتنع نرضع لو كنا برا البيت او حتى بالبيت وعندنا احد، غطا يضمن الخصوصية .
جهاز تسخين الرضاعة: ممكن تستغنين عنه، انا اخذت ولا استخدمته صراحة، بالنسبة لوضعي ما احتجت اسخن رضعاتها..بالاضافة لاني اخذته اساساً لتسخين الحليب بعد التجميد وما وصلنا لهالمرحلة.
كريم مرطب للحلمة: الكريمات كثيرة تاكدي بس انها آمنه للطفل بحيث تقدرين ترضعين بدون ماتمسحينها اسهل لك.
قطن للصدر: لمنع التسرب
قطعة سيليكون: اذا كان فيه صعوبة في الترضيع لان الطفل ما يلتقم بشكل سهل. موجودة في اغلب الصيدليات ومحلات الاطفال.
كمادات: تتسخن وتتجمد حسب الحاجة مفيدة جداًاذا تحجر الحليب.
المدرات الطبيعية: شاي مدرّ للحليب من اي هيرب، واعتمدي على المدرات الطبيعية مثل طبعاً الماء، البقدونس، السمسم او حلاوة الطحينية والطحينة، الحلبه، الشمر.
الترطيب: طبعاً نستمر بترطيب الجسم بعد الولادة باي منتج ارتحتي عليه، احياناً ماتظهر التشققات اثناء الحمل لكن تظهر بعد الولادة.
تجهيز البيبي:
كرسي سيارة+عربية:
اخترت دوونا وتكلمت عنها في حسابي بالانستجرام.
سرير دولاب ادراج
شراشف سرير
اخذت لميرا دولاب استخدم حالياً نصه فقط للفساتين والباقي تخزين، وادراج هي الي استخدمها اكثر شي، نظمتها بشكل يناسبني ( الدرج الأول لاغراض التغيير، الثاني بجامات/ملابس داخلية/بناطيل وقمصان/ والاخير للشراشف والاغراض الاضافية) سطح الادراج حطيت عليه فرشة تغيير اخذتها من مذركير، بكذا صار منصة تغيير متكاملة ما احتاج اتحرك من مكاني وقت التغيير. السرير عبارة عن مهد ايكيا ؛ له ارتفاعين والحاجز الجانبي ممكن ينشال بحيث نستفيد منه لاكثر من مرحلة، مثلاً نشيل الحاجز ونرفع السرير ويكون ملاصق لسريرك في البداية اسهل للترضيع والتنويم، بعد كذا يرجع الحاجز لمكانه، واذا بدأ الطفل يجلس او حاول يتمسك ويوقف ننزل السرير لارتفاع اقل، ولاحقاً بعد السنتين نلغي الحاجز الجانبي ويكون سرير عادي لطفل.
زبالة +اكياس.
اخذت من تومي تيبي ممتازة وانصح فيها جداً️ ضرورية جداً تعزل الحفاض ولا تطلع اي ريحة فما تضطرين تفرغينها الا مع زبايل البيت .الاشياء الاساسية والي بتبقى معك وقت طويل وممكن لطفل واكثر، لا تستهينين فيها🏻.
شنطة للمشاوير:
اهتمي بتقسيم الشنطة، انا اخذت ٢ وحدة من سنتربوينت مقسمة بشكل عملي ومريح استخدمها للطلعات اليومية، ووحدة شكلاً ارتب بس مالها جيوب tote فاخذت لها شنط تقسيم صغيرة رتبت فيها الاغراض.
بينزل بوست عن شنطة الطلعات ومحتوياتها على انستجرام.
مخدة: مخدة خاصة تساعد ان راس البيبي يكون متناسق تلقونها بالصيدليات واغلب محلات الاطفال.
أرواب: للايام الاولى عشان ماينضغط السرّ.
حفاضات:
راح انزل مقارنة بالانواع الي جربتها على انستجرام.
رضاعات مناسبة ٢كبار ٢صغار. ومصاصة \لهاية\باسفاير
جربت انواع كثيرة، يمكن اتكلم عنها في بوست مستقل.
كرسي شاور:
يساعدك وقت الترويش خصوصاًاذا لحالك تكون يدينك حرة .
منشفة.
شامبو وزيت.
حاولي تكون منتجات تركيبتها اقرب للطبيعي وخالية من المواد الضارة، اخذت لميرا من ايهيرب
جهاز قياس الحرارة.
منفاخ/منظف انف.
مقص اظافر.
مشط.
اخذتها مجموعة كاملة من تومي تيبي.
كريم تسلخات.
افضل شي جربته وخلاص ماراح ادور غيره زيت جوز الهند سحر يعالج بسرعة غير طبيعية.
مناديل
حاولي تكون بدون عطور، جربت ووتر وايبز ما ارتاحت عليها ميرا غيرنا لهجيز لفترة والان نستخدم قمر.
مهاد .
خذي انواع مختلفة ماراح تعرفين النوع الي يضبط معك الا بالاستخدام.
فيه انواع تكون لها شمع وتتسكر.. صراحة ماحبيتها ولا ضبطت معي نهائياً يمكن لان ميرا كان حجمها صغير بس اذا بتاخذين جربي حبة وحدة واحكمي.
اكياس النوم ممتازة حبيتها جداً تتاكدين ان البيبي متدفي وبشكل امن ماتخافين عليه.
بطانية.
يعتمد سمكها على وقت الولادة، عموماً المستشفيات دايماً باردة احرصي يكون معك بطانية حتى لو بالصيف.
منشفة ع الكتف.
لوقت التكريع/تتغير.
قبعات.
ضرورية جداً وخلي البيبي يلبسها طول الوقت.
ملابس داخلية
ملابس خارجية.
العدد حسب وضعك، اذا عندك احد يساعدك وتقدرين تغسلين اكثر من مرة بالاسبوع خذي من كل شيء ٦ الى ٨مثلاً، اذا ما عندك خذي اكثر . وبالمراجعات الأخيرة تقدر الدكتورة تقّدر حجم البيبي فتحددين المقاسات الي تاخذينها، انا اخذت نيوبورن و٠-٣ لكن احتجت زيادة من النيوبورن و٠-٣ استخدمناها الى عمر ال٤ او ٥ شهور
الملابس الداخلية افضل شي تكون بيضاء سادة اخذت لها من كارترز قطنها ناعم وممتازة، والخارجية احرصي تكون قطعة وحدة وازرارها من الامام، ويفضل يكون لليدين مجال تتسكر عشان اظافر البيبي ماتجي على وجهه اذا تحرك( القطعة الخاصة باليدين جربتها وماتثبت) اغلب الملابس عند نيكست اليدين تتقفل، وبعض المحلات صاروا يقتدون فيهم.
مدس.
انا ماحبيته ولا اخذت بس اشوف الكل ياخذ🤷🏻♀️.ما اعرف امسك البيبي فيه ولا اشوف له حاجة شخصياً، طبعاً كل انسان له وجهة نظره.
صابون غسيل ملابس الطفل.افضل شي جربته ومرتاحة عليه صابون الوزير
. هذي هي كل قائمة التجهيز بالنسبة لي وما احتجت غيرها. راح يكون فيه تدوينة لاحقة عن شنطة المستشفى وتشتمل على اشياء اكثر من الصيدلية لك وللبيبي، بنخليها لوقتها.
Comments