إ.أ: جون فريدا: شعر ناعم بلا عذاب لـ3أيام! |John Frieda: 3-Day Straight Frizz Free
ruba
Sep 9, 2015
2 min read
إ.أ” إنطباع أول.
تعرفون لما تشوفون منتج وتقولون مستحيل يكون واو، وتاخذونه وأنتم ناوين إنه يطلع فاشل وتجربونه ويطلع خو.را.فه!
هذا بالضبط الي صار معي لما أخذت هالبخاخ، صدق بعدما جيت جلست اغني كم كنت غبية لا لا :”( ليه ما اخذت المجموعة كاملة؟ الحين للأسف باضطر اطلبها.
هذا البخاخ سحر يابنات بمعنى الكلمة! تبخينه على شعرك بعد ماتنشفينه بالمنشفة مباشرة بعد الشاور وتمشطين عشان يتوزع..
بعد كذا تنشفينه بالسشوار عادي جداً، بس وش الي مو عادي؟ إنه اولاً بيطلع ناعم ومفرود و بيختصر عليك وقت التصفيف بشكل ماتصدقينه!
جد، أنا كنت من النوع الي اذا قربت للسشوار شعري ينفش بشكل مخيف! ولذلك كنت اخليه ينشف طبيعي وبعدين اسويه بالستريت او الفير، لكن سشوار لا.
الحين مع هذا البخاخ تش تش تش و بعدين وووويييي بالسشوار وخلصنا 🙂 اللهم احط عليه شوية سيروم بعد ما اخلص.. واذا بطلع مناسبة اعيد على بعض الخصل بالستريت.ما فيه نفشة إطلاقاً!
إذا كان وقت السشوار معك فرضاً 20 الى 30 دقيقة، وبعدها ستريت 15 دقيقة..مع البخاخ كل الي بتحتاجينه 10 دقايق سشوار و5 ستريت. بدون مبالغة!
أنا مو قادرة اصبر اطلب المجموعة كاملة، وشكلي بجرب منتجات ثانية بعد منهم.
هل هو فعلا يجلس 3 ايام؟ شخصياً جلس معي ..لكن أمانة ماجربته وقت أطلع فيه برا فما اقدر احكم لو يتأثر بحرارتنا اللطيفة أو لا.
له ريحة؟ كل المنتجات لها ريحة لكن ماهي ثابته مجرد ماتخلصين بتلقينها اختفت.
له قوام على الشعر او يلزّق؟ لا ابداً بس استخدامه على الشعر الرطب لاتحطينه على شعر جاف.
Comentarios