ديرما رولر Derma Roller

كثير منكم سأل، سمع، أو يفكر يطلب الديرما رولر..كان  فيه تفاعل قوي في سناب شات لتجربتي لذا بتكلم عنها الان عشان تسهل المقارنة بعدين.

الرولر عبارة عن الجهاز بالصورة، عجلة فيها ابر صغيرة تمشينها على المنطقة الي حابة تعالجينها بحيث تسويلك جروح ميكروسكوبية تحفز الخلايا والكولاجين إنهم يعالجون هال”جروح” بالتالي تتصحح المشكلة الي عندك للأبد بإذن الله.

مقاسات الرولر:

0.2mm/ 0.3mm

تستخدم لـ:

ترميم الجلد

تحسين الثعلبة.

0.5mm

تستخدم لـ:

تبييض البشرة

تحسين تصبغ الجلد

تحسين التجاعيد (منطقة ماحول العين)

تحسين الثعلبة

تحفيز الكولاجين

1.0mm/1.5mm/2.0mm

تستخدم لـ:

تحسين التجاعيد

تحفيز الكولاجين

تحسين ندبات الجلد

علاج السيلولايت

سماكة الجلد وعلامات التمدد

وطبعا كل المقاسات راح تساعد انك تمتصين وتستفيدين من أي كريم او سيريوم تحطينه معها او بعدها.

شخصيا طلبت 1.5 تشيل اثار الجروح وتصغر المسامات وتخفف الخطوط التعبيرية.

كيف نستخدمها؟

اول شي بسم الله

تجيبين موية حارة وتحطين فيها شوية معقم وتحطين الرولر فيها ١٠دقايق تتعقم حتى لو كانت جديدة، وهالخطوة بتسوينها كل مرة قبل وبعد ماتستخدمينها.

خلال هالوقت بتصنفرين وجهك وتغسلينه بغسولك وتنشفين، اذا كنتي بتستخدمين مخدر حطيه وغطيه بالتغليف البلاستيك حق الاكل 🙂 وبعد مايمر الوقت الي كاتبينه تغسلين وتصنفرين.

تطلعين الرولر وتمررينها على منشفة جافة.

الحين جاهزة للجلسة:

قسمي وجهك اذا كنتي بتسوينه كله الجبهه لحال والخد اليمين الخد اليسار اسفل الوجه، واذا جزء معين ابدي فيه على طول.

راح تمشين بالديرما على المنطقة عشرة مرات بالطول بعدين عشرة بالعرض واخيراً عشرة x.

الضغط مايكون قوي يحفّر وجهك ولا خفيف ماتحسين فيه، خلك وسط نفس ضغطك على القلم اذا كتبتي أو أقوى شوي يعني بتسمعين صوت الابر وهي تخترق الجلد..

واول ماتخلصين ادهني بفيسودين عشان يبرد وجهك وتضمنين انه يتعقم ولا يتلوث.

بعد اول يوم تقدرين تستخدمين كل شي طبيعي باستثناء المكياج. حطي الكريمات الي تبين مفعولها يبان، احرصي على سيروم فيتامين سي عشان النضارة وخلي وجهك مرطب دايماً واحرصي غسولك يكون لطيف ومافيه عطور.

تكرار الجلسة على الاقل يكون بعد اسبوعين واذا اكثر افضل بالبداية. وممنوع مشاركة الرولر حقتك انتي وبس.

والمكياج ع الاقل ننتظر اسبوع بعد الجلسة.

بالنسبة للاحمرار ماراح يطول لو سويتي الجلسة اول اليوم بنصه بيختفي.

فيه ألم؟ نعم وجدا!

محتمل؟ صراحة الموضوع كله بياخذ 20 دقيقة تقريبا، + متعودين على النتف والشمع والبلاوي الزرقا نقدر نستحمل هذا.

اذا عارفه نفسك ماتتحملين جيبي مخدر من الصيدلية.

لازم يطلع دم؟ لا مولازم يعني لاتتعمدين تضغطين عشان يطلع، لكن لو طلع فالوضع طبيعي مو مشكله

في الجلسة الاولى والثانية يمكن ماتتحملين غير الفيسودين أو كريمات لطيفة ، لكن من ثاني ليلة استخدمي الكريمات الي حابة تعالجلك أي مشكلة موجودة.

ايش استخدم معها؟ يرجعلك الخيار أولاً وأخيراً حسب الشي الي حابه تعالجينه سواء آثار حبوب مثلاً أو علامات تمدد الجلد..الخ بالنسبة للوجه أفضل شيء نضيفه لأي علاج فايتمين سي سيريوم، و\أو هايلرونك اسيد سيريوم للترطيب والنضارة.

طبعا غني عن الذكر انه مافيه مكياج ع الاقل الايام الثلاثة الاولى، وحطي للضرورة القصوى وباخف مايمكن.

أهم نقطتين بالموضوع:

الرولر لازم تتعقم قبل وبعد كل إستخدام.

ممنوع المشاركة منعاً باتاً، ولا اختك ولا أي احد..جهاز خاص بمستخدمه فقط.

Dermaroller: amazon.

#dermaroller #بشرة #ديرمارولر #عناية