Detox/ing? نتـ/ديتوكس؟

كثير صرنا نسمع عن الديتوكس وفوائد الديتوكس، لكن نسمع معلومات وكلام مختلف .. طيب ايش هو الديتوكس؟

الديتوكس عبارة عن نظام تنظيف وتطهيرالقولون، نتخلص فيه من السموم والعوالق المتراكمة من سنوات. من خلال الغذاء أولاً أو بمساعدة طبية.

ضروري الديتوكس؟ كيف أعرف إني أحتاجه؟

مافيه سبب يمنعك تسوينه بأي وقت، لكن فيه علامات أو دلائل إنك تحتاجينه، مثلاً مشاكل في الهضم، أرق، خمول ماينعشك شي ولا ١٠ أكواب قهوة، إكتئآب، رائحة كريهة للجسم من دون سبب، قلق، زيادة الوزن، التشتت.. طبعاً كل هالأعراض ممكن تكون دلالة على أشياء ثانية مثل ضغوطات الحياة أو لاسمح الله مشاكل صحية أو نفسية، لكن نقدر نبدأ بهالخطوة السهلة ونشوف إذا جابت نتيجة.

شخصياً أسوي ديتوكس كل شهر أوشهرين، وفي كل مرة أسويه تجيني أسئلة عنه وفي هالتدوينة راح أشرح كل شيء بإذن الله.

الديتوكس منه أنواع بعضها متطرف جداً والبعض نقدر نعتمده نظام غذائي دائم لو حبينا، يعني الموضوع أبداً ماهو محدد أو له قانون خاص زي بعض أنواع الحمية.

قبل نبدأ، نصيحة لازم نلتزم فيها..

إذا لاقدّر الله عندنا عارض صحي أو مرض مزمن، نستشير طبيبنا قبل نبدأ بأي نظام غذائي عشان مانتسبب لأنفسنا بمشكلة حنا بغنى عنها.

عندنا خطوط حمراء محددة ماندخلها في النظام أبداً، وبعض الدكاترة أو أخصائيي التغذية عندهم أنماط أو تصورات مختلفة لنظام الديتوكس المثالي، ونقدر نختار الأنسب والأفضل لنا.. بس ناخذ بعين الإعتبار إن النظام يُفترض يكون صارم شوي عشان يعطي نتيجة.

نبدأ أولاً بالخطوط الحمراء:

الملح ، السكر ، الكافيين (المنبهات) ، الكاربوهايدرات ، الدهون ، منتجات الحليب.

هذي هي الاشياء الممنوعة منع تام. ايش المسموح؟ جميع انواع الخضار والفواكه بأي شكل كان. نستثني طبعاً العصائر المعلبة.

كم مدة الديتوكس؟

الأقل ٣ أيام، وممكن نستمر قدر الإستطاعة، البعض يقترح أسبوع إلى ١٠ أيام كحد أقصى والبعض ينصح بالاستمرار لاسبوعين أو أكثر، في اعتقادي يعتمد الموضوع على حدة وصرامة نوع الديتوكس. وعلى نظامنا أو إختلال نظامنا، يعني في حال هذا الشهر مثلاً كثّرت قهوة وأكل من برا وسكريات و..الخ راح ألتزم بالديتوكس ٣ أيام على أقل تقدير، بينما الأشهر الي النظام فيها تمام ممكن أعدّيها بدون ديتوكس أو ديتوكس ليوم أو يومين.

من أكثر الأنواع تطرف هو ديتوكس الماء.. والبعض يقول أن الامام أحمد ابن حنبل من اشهر من قام بهذا الصيام او هذا النظام حيث كان يصل ل٤٠ يوم!!

نوع آخر يعتمد على السوائل أيضاً، وهو شرب الفواكه والخضار كعصير أو سموذي فقط.. حيث يُنصح بشرب ٥ إلى ١٤ كوب في اليوم.

النظام المفضل بالنسبة لي هو المعتمد على الخضار والفواكه دون تحديد، يعني بإمكاني آكل الخضار والفاكهة أو أشربها .. طبعاً ممكن نشوي الخضارأو نسلقه أو بالبخار اذا حبينا بس بدون اضافة الملح او السكر ..بالامكان اضافة الفلفل او الزعتر او القرفة او الكاكاو الغير محلى او السمّاق ..باختصار اي منكه طبيعي.

خلونا نتكلم بالتفصيل، عن المسموح والممنوع والمستحب.

السوائل:

-الماء:

طبعاً مايخفاكم أهمية الماء على الدوام وفي أي نظام، يُنصح بشرب لتر ونصف يومياً خلال البرنامج. وطبعاً ممكن ننكه الماء إذا كنا نمل، نضيف شرائح ليمون، أو خيار، أو فراوله، تفاح مع قرفه، الإضافة الي نحبها وممكن ننوع.وطبعاً نقسّم الكمية خلال اليوم. إذا كنتي مثلي تنسين الموضوعمن أساسه، أنصحك تقسمينها بشكل صعب تنسينه وبنفس الوقت سهل تتبنينه كعادة جديدة مثلاً كوب على الريق، وكوب بعد كل صلاة/أربطي الأذان بكوب مويا 😉 وكوب في أطول فترة بين صلاتين (حسب التوقيت  والفصل) وكوب قبل النوم. ممكن برضه نستعين بتطبيق على الجوال يذكرنا نشرب وراح تلقين كثير منها.

1. 
   

خلينا بالمرة نركز على موضوع مهم، وهو الماء بالليمون هذا هو السحر الي أغلب البنات للأسف ماتعرفه 😦 هذا الشراب مو بس لصحتك داخلياً يتعدى للبشرة ويعطيك نضارة تجنن الكل بيلاحظها.. خذيلك ليمونة واعصريها وحطيها ببراد مويا من النوع الي ياخذ لتر او اكثر وضيفي عليهاالمويا وخليها أما برا الثلاجة أو جوا.. واشربي كوب على الريق. بتلاحظين بنفسك النتيجة على بشرتك وعلى انتفاخ البطن كيف يخف وعموما شيء ساحر.

-الشاي:

طبعاً الشاي قلنا ممنوع لانه من المنبهات، لكن لو كان عندك شاي دي-كاف (منزوع الكافيين) نشرب منه لا بأس في حال كنا نحتاجه، والأخضر طبعاً أفضل من الأحمر.

-القهوة:

مع الأسف القهوة حتى لو كانت منزوعة الكافيين غير مسموحة، وبالنسبة لي هذاكان أصعب شي في الموضوع كله .. حتى العربية للبنات الغشاشين الي مايحسبونها ممنوعة بعد.

-العصائر:

زي ماقلنا العصائر المعلبة ممنوعة، والأفضل إننا نبتعد حتى عن عصير الفواكه الي نسويه بالبيت الأفضل منه هي العصائر الخضراء وراح أضيف تحت مجموعة عصائر جيّدة وقيمتها عالية.

-السموذي:

اذا كان مايحتوي على سكر ولا حليب لا بأس.

-الحليب:

الحليب (البقري) ممنوع ويأثر جداً-سلبياً- على خسارة الوزن وتطهير الجسم، ممكن نستبدل الحليب بحليب نباتي مثل الصويا، اللوز، الأرز.

المنكهات:

زي ماقلنا، الملح والسكر ممنوعة، والمنكهات الطبيعية الي ذكرتها سابقاً ومايشابهها مسموح.

الكاربوهيدرات:

الخبز، الرز، الكورن فليكس، بطاطس، باستا، مكرونات، تورتيلا، البقسماط، الشيبسات، المقرمشات،الكيك والبسكويت والمخبوزات كللللها ممنوعة حتى لوكانت بالقمح الكامل او الحبوب الكاملة.

اذا كنا حابين نخسر وزن، نبتعد عن الفواكه عدا الحامضة.

البروتين:

في بعض أنواع الديتوكس المعتدلة، البروتينات بجميع أشكالها مسموحة، بس طبعاً القلي ممنوع.

الخضروات:

ناكل منها قد مانقدر ونحب، جميع أنواع الخضروات مسموحة -باستثناء البطاطا نستبدلها بالبطاطا الحلوة- نركز اكثر شي على الخضراء منها، وعلى الطماطم، الزيتون-مش خضار بس ممتاز- الفلفل، والافوكادو.

الزيوت:

المسموح منها هو زيت الزيتون، وزيت الافوكادو.

البقول:

مسموحة في الانظمة المعتدلة، خصوصاً الفاصوليا السوداء والحمراء،والصويا.

ملحوظة جانبية:

نتأكد إن أول وجبة ناكلها ماتتعدى ساعة من الاستيقاظ، وما تزيد المدة بين الوجبات عن اربع ساعات ونصف، ونوقف الاكل او نصوم قبل النوم بثلاث ساعات.

بتلاحظين بعد ما تخلصين أيام الديتوكس، إن حاسة التذوق عندك تتنشط بشكل كبير يعني أكل البيت وطبخك الي متعوده عليه بتحسينه مالح بزيادة أو حلو بزيادة لان حليمات التذوق عندك تنظفت ورجعت تشتغل صح.

مشروبات للي يحب يجرب وينوع:

الأخضر:

خيارة + جرجير+ سبانخ+ تفاحتين -يفضل اخضر-+ نصف ليمونه+شوية زنجبيل طازج+ رشة فلفل حار

برتقال:

برتقالة او اثنين+ ربع ملفوف بنفسجي+ شبت+ بطيخ

سكررر:

خمسة تمرات+ ثلاث ارباع كوب حليب لوز او صويا+ ثلاث ارباع كوب لوز+ ثلج+ رشة قرفة.

مزاج:

٤ شرائح أناناس+ حبتين جزر+ كرز أو فراوله+ زنجبيل

جربتوا الديتوكس من قبل؟ كلموني عن تجاربكم واي نوع جربتوا و ملاحظاتكم؟

واذا ما جربتوا تعتقدون انكم بتجربون قريب؟ شخصياً احس لازم كل شخص يجرب الديتوكس لو مرة وحدة بحياته من باب الفضول ع الاقل.